(1921) Al Frayón

link

¿Nunca viestes un xilgueru
saltando trémulu inquietu
que de l’árbol baxa al’ matu
guelve esnalara a l’ himeru
lluego vien co la so fema
dirigense hacia un regueru
i unes payines atropen?...
Pos ye que, van facer ñeru.

¿Non sabéis q’ el ruinseñor
cuando la fema ta ‘n celu
cantai endeches d’amor
mientres ella pon el guevu
y si el dexa de xiblar
con so galana fineza
creyéndose abondá…
muérrese ella de tristreza?

Pos lo mismo q’ el xilgueru
q’el ruinseñor q’el Pinzón
anda recelosu, inquietu
el nuestro amigu “Franyón”.
De dos meses a esti tiempo
non ye el mozu gayasperu
que vive allegre y contentu,
¿será que va facel ñeru?

La maravillosa flauta
atacá de dulce miel
que tien é na so garganta
non paez la flauta d’él.
Son los gorgoritos dulces
mas ye tristes la voz bella…
¿Será que la fema en celu
quier tó la flauta pa ella?

Rapacina: no hay derechu
a tan males intenciones;
anque cargues co la flauta
por Dios, dexamos los sones,
que Noreña queda triste
sin la máxica garganta
que alloria los corazones
cuando asturianades canta.

¿Sin la voz guapa y sentida
que y’el alma de les gromes,
¿quién va allegrar vuestra vida
en los domingos tristones?
Carga tu sola con él…
más te ruego por el cielu
que dalguna q’otra vez
lu dexes tender el vuelu.

Y al amigu cariñosu
de vos acariciadora;
soplicoi muy respetuosu
non dexe el cantar sabrosu
todu pa la ruinseñora;
y pidoi pa terminar
estos versos mal iguaos,
q’ hoy cante hasta fartucar
i aplaudirán a rabiar
los amigos convidaos.